ಮನೆಯಲ್ಲಿ ಕದ್ದು ಸಿಕ್ಕಿಬಿದ್ದ

ಹಂಬರ್ಸೈಡ್,ಫೆ. 3 : 23 ವರ್ಷದ ಯುವಕ ಪಕ್ಕಾ ಶೋಕಿಲಾಲಾ. ತನ್ನ ಈ ಶೋಕಿ ಜೀವನಕ್ಕಾಗಿ ಈತ ತನ್ನದೇ ಅಜ್ಜಿ ಮನೆಯಲ್ಲಿ ಹಣ ಕದ್ದು ಪರಾರಿಯಾಗಿದ್ದ. ಈತನನ್ನು ಯುಕೆಯ ಹಂಬರ್ಸೈಡ್ ಪೊಲೀಸರು ಬಂಧಿಸಿ ಕಂಬಿ ಹಿಂದೆ ತಳ್ಳಿದ್ದರು. ಜೊತೆಗೆ, ಈತನ ಕುಕೃತ್ಯದ ಬಗ್ಗೆ ಫೇಸ್ಬುಕ್ನಲ್ಲೂ ಬರೆದು ಮಾಹಿತಿ ನೀಡಿದ್ದರು. ಆದರೆ, ಸಾಮಾಜಿಕ ಮಾಧ್ಯಮದಲ್ಲಿ ಈತ ಕಳ್ಳತನದ ಪ್ರಕರಣಕ್ಕಿಂತಲೂ ತನ್ನ ಕುತ್ತಿಗೆಯ ಕಾರಣಕ್ಕೆ ಭಾರೀ ಸುದ್ದಿಯಾಗಿದ್ದ…! ಈ ಕಳ್ಳನ ಹೆಸರು ಹ್ಯಾರಿಸನ್ ಡೇವಿಸ್. ಈತ ತನ್ನ ಅಜ್ಜಿ ಮನೆಯಲ್ಲಿ 24,000 ಪೌಂಡ್ ಹಣ ಅಂದರೆ ಭಾರತದ ಸುಮಾರು 20,60,713 ನಗದು ಕದ್ದಿದ್ದ. ಇದಾದ ಬಳಿಕ ಮತ್ತೆ 94 ಸಾವಿರದಷ್ಟು ಹಣ ಕದಿಯುವ ಯತ್ನ ನಡೆಸಿದ್ದ. ಈ ವೇಳೆ, ಈತನನ್ನು ಪೊಲೀಸರು ಬಂಧಿಸಿದ್ದರು. ಬಳಿಕ ಪೊಲೀಸರು ಫೇಸ್ಬುಕ್ನಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ್ದರು. ಈ ವೇಳೆ, ನೆಟ್ಟಿಗರು ಈತನ ಅಪರಾಧಕ್ಕಿಂತಲೂ ಹೆಚ್ಚು ಗಮನಿಸಿದ್ದು, ಈತನ ಕುತ್ತಿಗೆಯ ಉದ್ದವನ್ನು…! ಯಾವಾಗ ಈತನ ಫೋಟೋವನ್ನು ಪೊಲೀಸರು ಹಂಚಿಕೊಂಡರೋ ಇದಾದ ಬಳಿಕ ಈ ಫೋಟೋ ಹಲವು ಟ್ವೀಟ್, ಮೀಮ್ಸ್ಗೆ ವಸ್ತುವಾಗಿದೆ. ಕೆಲವರು ಈತನನ್ನು ಜಿರಾಫೆಗೂ ಹೋಲಿಸಿದ್ದಾರೆ. ಜಿರಾಫೆಯ ಕುತ್ತಿಗೆಗೆ ಈತನ ತಲೆಯ ಚಿತ್ರವನ್ನಿಟ್ಟು ಫೋಟೋಶಾಪ್ ಮಾಡಿದ್ದ ಫೋಟೋ ಕೂಡಾ ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡಲು ಶುರುವಾಗಿತ್ತು. ಜೊತೆಗೆ, ಇಂತಹದ್ದೇ ಅನೇಕ ಫೋಟೋಗಳು ಕೂಡಾ ವೈರಲ್ ಆಗುತ್ತಿವೆ. ಇನ್ನು, ಈತನನ್ನು ಚಿಕ್ಕಂದಿನಿಂದಲೇ ಅಜ್ಜಿಯೇ ಸಾಕಿದ್ದರು. ಹೀಗಾಗಿ, ಮೊಮ್ಮಗನ ಈ ಕೃತ್ಯದಿಂದ ಅಜ್ಜಿ ಬಹುವಾಗಿ ನೊಂದಿದ್ದಾರೆ. ಮೊಮ್ಮಗ ತನಗೇ ಈ ರೀತಿ ಮೋಸ ಮಾಡುತ್ತಾನೆ ಎಂದು ಗೊತ್ತಿರಲಿಲ್ಲ ಎಂದು ಅಜ್ಜಿ ನೊಂದು ನುಡಿದಿದ್ದಾರೆ. ಈತ ಅಜ್ಜಿಯ ಹೆಸರನ್ನು ಬಳಸಿಕೊಂಡು ಬ್ಯಾಂಕಿನಲ್ಲಿ ಅಕೌಂಟ್ ತೆಗೆದಿದ್ದನಂತೆ. ಜೊತೆಗೆ, ಲೋನ್ ಕೂಡಾ ಪಡೆದಿದ್ದನಂತೆ. ಹೀಗೆ ಬಂದ ಹಣದಲ್ಲಿ ತನಗೆ ಬೇಕಾದ ವಸ್ತುಗಳನ್ನು ಮತ್ತು ಮಾದಕ ದ್ರವ್ಯಗಳನ್ನು ಈತ ಖರೀದಿಸುತ್ತಿದ್ದ ಎನ್ನಲಾಗಿದೆ. ಸದ್ಯ ಮಾಡಿದ ತಪ್ಪಿಗೆ ಈ ಯುವಕನಿಗೆ ಎರಡು ವರ್ಷಗಳ ಕಾಲ ಜೈಲುಶಿಕ್ಷೆ ವಿಧಿಸಲಾಗಿದೆ.