ಶಹಾಪುರ: ಬಿಜೆಪಿ ಪಕ್ಷದ ಮುಖಂಡರು ನಿವೇಶನ ಹಕ್ಕುಪತ್ರ ವಿಷಯದಲ್ಲಿ ಸುದ್ದಿಗೋಷ್ಠಿ ನಡೆಯಿಸಿ ಇಲ್ಲಸಲ್ಲದ ಆರೋಪ ಮಾಡಿದ್ದು, ಅನವಶ್ಯಕವಾಗಿ ಫಲಾನುಭವಿಗಳಲ್ಲಿ ಗೊಂದಲ ಉಂಟು ಮಾಡುವುದು ಸರಿಯಲ್ಲ. ಫಲಾನುಭವಿಗಳನ್ನು ಎತ್ತಿಕಟ್ಟಿ ರಾಜಕೀಯ ಮಾಡುವುದು ನಿಲ್ಲಿಸಿ. ಸತ್ಯಾಂಶ ಬಹಿರಂಗಪಡಿಸಿ ಎಂದು ನಗರ ಆಶ್ರಯ ಸಮಿತಿ ಅಧ್ಯಕ್ಷ ವಸಂತ ಸುರಪುರಕರ್ ತಿರುಗೇಟು ನೀಡಿದ್ದಾರೆ.
ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು ನಗರದ ಫೀಲ್ಟರ್ ಬೆಡ್ ಬಡವಾಣೆಯ ಫಲಾನುಭವಿಗಳಿಗೆ ಸರ್ಕಾರದ ಮಾರ್ಗಸೂಚಿ ನಿಯಮದ ಪ್ರಕಾರ ಹಕ್ಕಪತ್ರ ಹಂಚಿಕೆ ಮಾಡಿದೆ. ಜಿಲ್ಲಾ ಉಸ್ತುವಾರಿ ಸಚಿವರು ಅಭಿವೃದ್ದಿ, ಕೆಲಸಗಳಿಗೆ ಯಾವತ್ತೂ ತಾರತಮ್ಯ ಹಾಗೂ ರಾಜಕೀಯ ಮಾಡಿದವರಲ್ಲ. ನಿಮ್ಮ ಪಕ್ಷದಲ್ಲಿ ನಿಯಂತ್ರಣವಿಲ್ಲದ ಕಾರಣ ಜಿಲ್ಲಾ ಘಟಕದ ಅಧ್ಯಕ್ಷ ಹುದ್ದೆ ಕಳೆದುಕೊಂಡು ಹತಾಶೆಯ ಮಾತುಗಳನ್ನು ಆಡಿದರೆ ಯಾರು ನಂಬುವುದಿಲ್ಲ. ಕೊಟ್ಟ ಕುದುರೆಯನ್ನು ಏರದವನೂ ಧೀರನೂ ಅಲ್ಲ, ಶೂರನು ಅಲ್ಲ ಎಂಬುವುದು ತಿಳಿದುಕೊಳ್ಳಿ, ಬಿಜೆಪಿಯವರು ಅಭಿವೃದ್ದಿ ಕೆಲಸಗಳಿಗೆ ಅಡ್ಡಗಾಲು ಹಾಕಬೇಡಿ ಎಂದು ಸಲಹೆ ನೀಡಿದ್ದಾರೆ. ಇದನ್ನೂ ಓದಿ: ವಕ್ಫಾ ಆಸ್ತಿಗಳಲ್ಲ ಅದು ಅಂಜುಮನ ಒಡೆತನದ ಆಸ್ತಿ..!
ಜಿಲ್ಲಾ ಬಿಜೆಪಿ ಘಟಕದ ಅಧ್ಯಕ್ಷರು ತಮ್ಮ ಹುದ್ದೆಯ ಗೌರವ ಮರೆತು ಫಲಾನುಭವಿಗಳಿಂದ ೩೦ ಸಾವಿರ ಲಂಚ ಪಡೆದು ಕೊಂಡಿದ್ದಾರೆ ಎಂಬ ಹೇಳಿಕೆಯು ಹಾಸ್ಯಾಸ್ಪದವಾಗಿದೆ. ಇಂತಹ ಬಾಲಿಶತನದ ಹೇಳಿಕೆ ನೀಡುವುದು ನಿಲ್ಲಿಸಿ ಜಿಲ್ಲೆಯ ಸಮಗ್ರ ಅಭಿವೃದ್ದಿ ವಿಚಾರದ ಬಗ್ಗೆ ಮಾತನಾಡಿ ಎಂದು ತಿಳಿಸಿದ್ದಾರೆ.
