ಬೆಂಗಳೂರು: ಕರ್ನಾಟಕದಲ್ಲಿ ಮಾರಾಟವಾಗುತ್ತಿರುವ E20 ಪೆಟ್ರೋಲ್ನಲ್ಲಿ ನಿಗದಿತ ಶೇ.20ರ ಮಿತಿಗಿಂತ ಹೆಚ್ಚು, ಅಂದರೆ ಶೇ.30ಕ್ಕೂ ಅಧಿಕ ಎಥನಾಲ್ ಮಿಶ್ರಣ ಮಾಡಲಾಗುತ್ತಿದೆ ಎಂಬ ರಾಜ್ಯ ಸರ್ಕಾರದ ಆರೋಪವನ್ನು ಪ್ರಮುಖ ತೈಲ ಕಂಪನಿಗಳಾದ IOCL, BPCL ಮತ್ತು HPCL ತೀವ್ರವಾಗಿ ನಿರಾಕರಿಸಿವೆ.
ರಾಜ್ಯ ಸರ್ಕಾರದ ‘ಆಪರೇಷನ್ ನಿಖರ್’ ಅಭಿಯಾನದಡಿ ಬೆಂಗಳೂರು, ಕೋಲಾರ, ಚಿಕ್ಕಬಳ್ಳಾಪುರ, ರಾಮನಗರ, ಮಂಗಳೂರು ಸೇರಿದಂತೆ ವಿವಿಧ ಜಿಲ್ಲೆಗಳ ಪೆಟ್ರೋಲ್ ಬಂಕ್ಗಳಿಂದ ಮಾದರಿಗಳನ್ನು ಸಂಗ್ರಹಿಸಿ NABL ಮಾನ್ಯತೆ ಪಡೆದ ಪ್ರಯೋಗಾಲಯದಲ್ಲಿ ಪರೀಕ್ಷಿಸಲಾಗಿತ್ತು. ವರದಿಯಲ್ಲಿ IOCL ಪೆಟ್ರೋಲ್ನಲ್ಲಿ ಶೇ.31.2 ಹಾಗೂ HPCL ಪೆಟ್ರೋಲ್ನಲ್ಲಿ ಶೇ.30.5ರಷ್ಟು ಎಥನಾಲ್ ಪತ್ತೆಯಾಗಿದೆ ಎಂದು ಸಚಿವ ರಿಜ್ವಾನ್ ಅರ್ಷದ್ ತಿಳಿಸಿದ್ದರು.
ಹೆಚ್ಚಿನ ಎಥನಾಲ್ ಮಿಶ್ರಣದಿಂದ ವಾಹನಗಳ ಎಂಜಿನ್ಗೆ ಹಾನಿಯಾಗುವ ಜೊತೆಗೆ ಮೈಲೇಜ್ ಕಡಿಮೆಯಾಗಿ ಗ್ರಾಹಕರಿಗೆ ನಷ್ಟವಾಗುತ್ತಿದೆ ಎಂದು ಸರ್ಕಾರ ಆರೋಪಿಸಿತ್ತು. ಗ್ರಾಹಕರಿಗೆ ಪರಿಹಾರ ನಿಧಿ ಸ್ಥಾಪಿಸುವಂತೆ ಮತ್ತು ತೈಲ ಕಂಪನಿಗಳ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಕೇಂದ್ರಕ್ಕೆ ಮನವಿ ಮಾಡಿತ್ತು.
ಆದರೆ, ಈ ಆರೋಪಗಳನ್ನು ತಳ್ಳಿಹಾಕಿರುವ ಮೂರು ಕಂಪನಿಗಳು, ತಮ್ಮ ಬಂಕ್ಗಳಲ್ಲಿ ಮಾರಾಟವಾಗುವ E20 ಪೆಟ್ರೋಲ್ BIS IS 17021 ಮಾನದಂಡಗಳಿಗೆ ಅನುಗುಣವಾಗಿದ್ದು, ಎಥನಾಲ್ ಪ್ರಮಾಣ ಶೇ.19ರಿಂದ 21ರಷ್ಟಿದೆ ಎಂದು ಸ್ಪಷ್ಟಪಡಿಸಿವೆ.
ಮಾದರಿ ಸಂಗ್ರಹಣೆ ವೇಳೆ ತೈಲ ಕಂಪನಿಗಳ ಪ್ರತಿನಿಧಿಗಳು ಉಪಸ್ಥಿತರಿರಲಿಲ್ಲ. ಸಂಗ್ರಹಿಸಿದ ಮಾದರಿಗಳ ಪ್ರತಿಗಳು ಹಾಗೂ ಸಂಪೂರ್ಣ ಪ್ರಯೋಗಾಲಯ ವರದಿಗಳನ್ನು ನೀಡದ ಕಾರಣ ಮರುಪರೀಕ್ಷೆಗೆ ಅವಕಾಶ ಸಿಕ್ಕಿಲ್ಲ ಎಂದು ಕಂಪನಿಗಳು ಆಕ್ಷೇಪಿಸಿವೆ.
ಅಲ್ಲದೆ, ಗ್ಯಾಸ್ ಕ್ರೋಮಟೋಗ್ರಫಿ ಪರೀಕ್ಷೆಯ ವಿಧಾನ ಮತ್ತು ಬಳಸಿದ ಪ್ರಮಾಣೀಕೃತ ಉಲ್ಲೇಖ ಸಾಮಗ್ರಿಗಳ ಕುರಿತು ಸೂಕ್ತ ಮಾಹಿತಿ ನೀಡಿಲ್ಲ ಎಂದು ಆರೋಪಿಸಿವೆ. ಇಂಧನದ ಸಾಂದ್ರತೆಯ ಅಂಕಿಅಂಶಗಳೂ ಶೇ.30ಕ್ಕೂ ಅಧಿಕ ಎಥನಾಲ್ ಮಿಶ್ರಣವಾಗಿದೆ ಎಂಬ ವರದಿಗೆ ಹೊಂದಿಕೆಯಾಗುವುದಿಲ್ಲ ಎಂಬುದು ಕಂಪನಿಗಳ ವಾದ.
ಹೀಗಾಗಿ ಸರ್ಕಾರದ ಆರೋಪ ಮತ್ತು ತೈಲ ಕಂಪನಿಗಳ ಸ್ಪಷ್ಟನೆಗಳ ನಡುವೆ E20 ಪೆಟ್ರೋಲ್ ಗುಣಮಟ್ಟದ ವಿವಾದ ತೀವ್ರಗೊಂಡಿದ್ದು, ಪಾರದರ್ಶಕ ಮರುಪರೀಕ್ಷೆಗೆ ಆಗ್ರಹ ವ್ಯಕ್ತವಾಗಿದೆ.
