ಶಹಾಪುರ: ಇಲ್ಲಿನ ನ್ಯಾಯಾಲಯದಲ್ಲಿ ಎಂದಿನಂತೆ ಸುಗಮವಾಗಿ ಕಲಾಪ ನಡೆಯುತ್ತಿದ್ದಾಗ ಬಾಂಬ್ ಬೆದರಿಕೆ ಸಂದೇಶ ರವಾನಿಯಾದ ಬಳಿಕ ಆತಂಕಗೊಂಡು ಕಲಾಪವನ್ನು ಮೊಟಗುಗೊಳಿಸಿ ನ್ಯಾಯಾಧೀಶರು ನೇರವಾಗಿ ವಕೀಲರನ್ನು, ಕಕ್ಷಿದಾರರನ್ನು ಹೊರ ನಡೆಯುವಂತೆ ಸೂಚಿಸಿದರು. ಸಿಬ್ಬಂದಿಯು ನ್ಯಾಯಾಲಯದ ಆವರಣದಲ್ಲಿ ಸೇರಿಕೊಂಡರು.
ಜಿಲ್ಲಾ ನ್ಯಾಯಾಲಯದಿಂದ ತುರ್ತು ಸಂದೇಶ ರವಾನೆಯಾಗಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಎಲ್ಲಾ ವಕೀಲರು, ಕಕ್ಷಿದಾರರು ನ್ಯಾಯಾಲಯದಿಂದ ಹೊರ ಹೋಗುವಂತೆ ಹಿರಿಯ ಶ್ರೇಣಿ ನ್ಯಾಯಾಲಯದ ನ್ಯಾಯಾಧೀಶೆ ಹೇಮಾ ಪಸ್ತಾಪುರ ಸೂಚಿಸಿದರು. ಇದರಿಂದ ವಕೀಲರಲ್ಲಿ ಹಾಗೂ ಕಕ್ಷಿದಾರರಲ್ಲಿ ಆತಂಕ, ಗೊಂದಲ, ಭೀತಿ ಉಂಟಾಗಿ ಗುಂಪು ಗುಂಪಾಗಿ ಜಮಾವಣೆಗೊಂಡು ಹೊರ ನಡೆದರು.
ನಂತರ ಮಧ್ಯಾಹ್ನ 3.30 ಗಂಟೆಗೆ ಮತ್ತೆ ನ್ಯಾಯಾಲಯದ ಕಲಾಪ ಆರಂಭಗೊಳಿಸಿದರು. ಆಗ ಯಾದಗಿರಿಯಿಂದ ಬಾಂಬ್ ನಿಷ್ಕೃಯ ಸಿಬ್ಬಂದಿ ಶ್ವಾನದೊಂದಿಗೆ ನ್ಯಾಯಾಲಯದ ಸಂಪೂರ್ಣ ಪ್ರದೇಶವನ್ನು ತಪಾಸಣೆ ನಡೆಸಿದರು. ಆಗ ಯಾವುದೇ ಬಾಂಬ್ ಪತ್ತೆ ಆಗಲಿಲ್ಲ. ಇದು ಹುಸಿ ಸಂದೇಶವಾಗಿದೆ ಎಂದು ನ್ಯಾಯಾಲಯದ ಸಿಬ್ಬಂದಿ, ವಕೀಲರು ನಿಟ್ಟುಸಿರು ಬಿಟ್ಟರು.
