ಬೆಂಗಳೂರು: ಇತ್ತೀಚಿಗ ಸಿಲಿಕಾನ್ ಸಿಟಿ ಬೆಂಗಳೂರು ನಗರದಲ್ಲಿ ಜಾಂಬಿ ಡ್ರಗ್ಸ್ ಸೇವನೆ ಮಾಡಿ ವ್ಯಕ್ತಿಯೊಬ್ಬರು ನಿಂತಲ್ಲಿ ನಿಂತು ವಿಚಿತ್ರ ವರ್ತನೆ ಮಾಡುತ್ತಿದ್ದ ವಿಡಿಯೋ ಒಂದು ಸೋಶಿಯಲ್ ಮೀಡಿಯಾದಲ್ಲಿ ಸಕ್ಕತ್ ವೈರಲ್ ಆಗಿತ್ತು.
ಅಲ್ಲದೆ ಜಾಂಬಿ ಡ್ರಗ್ಸ್ ಕುರಿತಾಗಿ ಕನ್ನಡದ ಖ್ಯಾತ ನಟ ದುನಿಯಾ ವಿಜಯ್ ಅವರು ಕೂಡ ವಿಡಿಯೋ ಒಂದನ್ನು ಮಾಡಿ ತಮ್ಮ ಸೋಶಿಯಲ್ ಮೀಡಿಯಾಗಳಲ್ಲಿ ಹಂಚಿಕೊಂಡಿದ್ದರು. ಆದರೆ ಆ ವ್ಯಕ್ತಿ ಜಾಂಬಿ ಡ್ರಗ್ಸ್ ಸೇವನೆ ಮಾಡಿದ್ರು ಎಂಬ ಸ್ಪಷ್ಟನೆ ಇಲ್ಲದೆ ವಿಡಿಯೋ ಶೇರ್ ಮಾಡಿರೋದು ತಪ್ಪು ಎಂದು ತಿಳಿಯುತ್ತಿದ್ದಂತೆ ತಮ್ಮ Instagram ನಲ್ಲಿದ್ದ ವಿಡಿಯೋವನ್ನು ನಟ ದುನಿಯಾ ವಿಜಯ್ ಅವರು ಡಿಲೀಟ್ ಮಾಡಿದ್ದರು.
ಇನ್ನು ಡಿಲೀಟ್ ಮಾಡಿದ ವಿಡಿಯೋವನ್ನು ರಿಟ್ರಿವ್ ಗಾಗಿ ಬಾಗಲೂರು ಪೊಲೀಸರು ಇನ್ಸ್ಟಾಗ್ರಾಮ್ ಗೆ ಪತ್ರ ಬರೆದಿದ್ದಾರೆ ಎನ್ನಲಾಗಿದೆ. ಅಲ್ಲದೆ ಇದೇ ವಿಡಿಯೋವನ್ನು ಬೆಂಗಳೂರಿನ ಮಾಜಿ ಪೊಲೀಸ್ ಕಮಿಷನರ್ ಬಾಸ್ಕರ್ ರಾವ್ ಕೂಡ ದುನಿಯಾ ವಿಜಯ್ ರೀತಿಯಲ್ಲಿ ವೈರಲ್ ವಿಡಿಯೋ ಶೇರ್ ಮಾಡಿ, ಬಳಿಕ ಡಿಲೀಟ್ ಮಾಡಿದ್ದರು. ಅವರಿಗೂ ಈಗ ಸಂಕಷ್ಟ ಎದುರಾಗಲಿದೆ. ಇದನ್ನೂ ಓದಿ: ನನಗೆ ಕಾಂಗ್ರೆಸ್ ಏನು ಕಡಿಮೆ ಮಾಡಿಲ್ಲ: ಜಮೀರ್ ಅಹ್ಮದ್
ವಿಡಿಯೋದ ಬಗ್ಗೆ ಪೂರ್ವಪರ ತಿಳಿಯದೇ ಸುಳ್ಳು ಮಾಹಿತಿ ಇರುವ ವಿಡಿಯೋ ಶೇರ್ ಮಾಡಿರುವ ಬಗ್ಗೆ ಸ್ಪಷ್ಟನೆ ಕೊಡಲು ಈವರೆಗೆ ಒಟ್ಟು 15 ಮಂದಿಗೆ ನೋಟಿಸ್ ಕೊಡಲಾಗಿದೆ. ಅದೇ ರೀತಿ ನಟ ದುನಿಯಾ ವಿಜಯ್ ಹಾಗೂ ಮಾಜಿ ಪೊಲೀಸ್ ಕಮಿಷನರ್ ಬಾಸ್ಕರ್ ರಾವ್ ಕೂಡ ಶೇರ್ ಮಾಡಿದ್ದು, ವಿಡಿಯೋ ರಿಟ್ರೀವ್ ಆಗುತ್ತಿದ್ದಂತೆ ನೋಟಿಸ್ ಕೊಡಲು ಬಾಗಲೂರು ಪೊಲೀಸರು ಚಿಂತನೆ ನಡೆಸಿದ್ದಾರೆ. ಒಂದು ವೇಳೆ ಜಾಂಬಿ ಡ್ರಗ್ಸ್ ವೈರಲ್ ವಿಡಿಯೋ ರಿಟ್ರೀವ್ ಆಗಿ ಬಂದರೆ ಸ್ಯಾಂಡಲ್ವುಡ್ ನಟ ದುನಿಯಾ ವಿಜಯ್, ಮಾಜಿ ಐಪಿಎಸ್ ಭಾಸ್ಕರ್ ರಾವ್ ಇಬ್ಬರೂ ವಿಚಾರಣೆ ಎದುರಿಸಬೇಕಾದ ಅನಿವಾರ್ಯತೆ ಎದುರಾಗಲಿದೆ.
