ಶಹಾಪುರ: ಗ್ರಾಮೀಣ ಭಾಗದ ಶಾಲೆ, ರಸ್ತೆ ಕುಡಿಯುವ ನೀರು ಸೇರಿದಂತೆ ಮೂಲ ಸೌಕರ್ಯಗಳಿಗೆ ಅನುದಾನವನ್ನು ಸರ್ಕಾರ ಒದಗಿಸುತ್ತಿದ್ದು, ಕ್ಷೇತ್ರದಲ್ಲಿ ಜನತೆಯ ನಿರೀಕ್ಷೆಗೂ ಮೀರಿ ಹೆಚ್ಚಿನ ಅಭಿವೃದ್ಧಿ ಕಾಮಗಾರಿಗಳನ್ನು ಕೈಗೊಳ್ಳಲು ಆದ್ಯತೆ ನೀಡಲಾಗುತ್ತಿದೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಶರಣಬಸಪ್ಪಗೌಡ ದರ್ಶನಾಪುರ ಹೇಳಿದರು.
2024-25ನೇ ಸಾಲಿನ ಕಲ್ಯಾಣ ಪಥ ಯೋಜನೆಯಡಿ 4 ಕೋಟಿ ರೂ.ವೆಚ್ಚದಲ್ಲಿ ನಗರದಿಂದ ಹಾಲಭಾವಿ ರಸ್ತೆ ವರೆಗೆ, ಮುಖ್ಯಮಂತ್ರಿಗಳ ವಿಶೇಷ ಅನುದಾನದಡಿಯಲ್ಲಿ ಮಕ್ತಾಪುರ ಕ್ರಾಸ್ನಿಂದ ಹೊತಪೇಠ ಕ್ರಾಸ್ ವರೆಗೆ 84 ಲಕ್ಷ ರೂ. ವೆಚ್ಚದ ರಸ್ತೆ, ಮಕ್ತಾಪುರ ನಿಂದ ಹಾಲಭಾವಿ ರಸ್ತೆ ವರೆಗೆ 75 ಲಕ್ಷ ರೂ. ವೆಚ್ಚದ ರಸ್ತೆ ಕಾಮಗಾರಿಗಳನ್ನು ವಿಕ್ಷೀಸಿ ಮಾತನಾಡಿದ ಅವರು, ಎಲ್ಲಾ ಮೂಲಭೂತ ಸೌಲಭ್ಯಗಳ ಜೊತೆಗೆ ಮತಕ್ಷೇತ್ರದ ಸಮಗ್ರ ಅಭಿವೃದ್ಧಿಗೆ ಕಾಳಜಿ ವಹಿಸಲಾಗುತ್ತಿದೆ. ಕ್ಷೇತ್ರದ ಜನತೆಯ ನಿರೀಕ್ಷೆಗೆ ಮೀರಿ ಕೆಲಸ ಮಾಡಲಾಗುತ್ತದೆ ಎಂದರು. ಇದನ್ನೂ ಓದಿ: ನನ್ನ ಕಷ್ಟಕಾಲದಲ್ಲಿ ಜನರು ಮಾಡಿದ್ದ ಪ್ರಾರ್ಥನೆ ಮರೆಯುವುದಿಲ್ಲ: ಡಿಕೆಶಿ
ಉತ್ತಮ ಮತ್ತು ಗುಣಮಟ್ಟದ ವಿಶಾಲವಾದ ರಸ್ತೆಗಳ ಮಂಜೂರಿಯಿಂದ ನಗರಕ್ಕಿಂತ ಗ್ರಾಮಿಣ ಭಾಗ ಯಾವುದೇ ಕೊರತೆಯಾಗದಂತೆ ನೋಡಿಕೊಳ್ಳಲಾಗುತ್ತಿದ್ದು ವಾಹನಗಳ ಸುಗಮ ಸಂಚಾರಕ್ಕೆ ಅನುಕೂಲವಾಗಲಿದೆ. ರಸ್ತೆಗಳು ಮುಂದಿನ 5 ವರ್ಷದ ವರೆಗೆ ನಿರ್ವಹಣೆ ಇರಲಿದೆ. ಇನ್ನೂ ಗ್ರಾಮೀಣ ರಸ್ತೆಗಳ ಅಭಿವೃದ್ಧಿಯಿಂದಲೇ ಹಳ್ಳಿಗಳ ಪ್ರಗತಿ ಹೊಂದಲು ಸಾಧ್ಯವಾಗುತ್ತದೆ. ಕಾಮಗಾರಿಗಳಿಗೆ ಸಂಭಂಧಿಸಿದ ಗುತ್ತಿಗೆದಾರರು ಗುಣಮಟ್ಟದ ವಸ್ತುಗಳನ್ನು ಬಳಸಿ, ಸಮಯದಲ್ಲಿ ಕಾಮಗಾರಿ ಮುಗಿಸಿ ಗ್ರಾಮಸ್ಥರಿಗೆ ಅನುಕೂಲ ಮಾಡಿಕೊಡಬೇಕು ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಶಿವುಮಾಹಂತ ಚಂದಾಪುರ, ಅಲ್ಲಾ ಪಟೇಲ್ ಮಕ್ತಾಪುರ, ನಿವೃತ್ತ ನ್ಯಾಯಾಧೀಶ ಸಿದ್ದಪ್ಪ ಹಾಲಭಾವಿ, ಬಸಣಗೌಡ ಹಾಲಭಾವಿ, ಭೀಮರೆಡ್ಡಿ ಪಾಟೀಲ್ ಹಾಲಭಾವಿ, ರಂಗನಗೌಡ ಬಿರಾದಾರ ಹುಲ್ಕಲ್, ಗುತ್ತಿಗೆದಾರರಾದ ಶಂಕರಗೌಡ ಹುಲ್ಕಲ್, ಭೀಮರೆಡ್ಡಿ ಬೋಸಗಿ, ಶಂಕರ ಬೋಸಗಿ ಸೇರಿದಂತೆ ಮಕ್ತಾಪುರ ಗ್ರಾಮಸ್ಥರು ಇದ್ದರು.
