ಬೆಂಗಳೂರು: ಈ ಸಲ ಕಪ್ ನಮ್ದೇ… ಈ ಸಲ ಕಪ್ ನಮ್ದೇ ಅಂತಾ ಸತತ 17 ವರ್ಷ ಕಠಿಣ ತಪ್ಪಸ್ಸನ್ನೇ ಮಾಡಿರುವ ಅಭಿಮಾನಿಗಳಿಗೆ ಆರ್ಸಿಬಿ ತಂಡ ಈ ಬಾರಿ ಫೈನಲ್ ಪ್ರವೇಶಿಸಿ ಕಪ್ ಬರ ನೀಗಿಸುವ ಪಣ ತೊಟ್ಟಿದೆ. ಕಳೆದ 17 ಆವೃತ್ತಿಗಳಲ್ಲಿ ಮೂರು ಬಾರಿ ಫೈನಲ್ ತಲುಪಿ ಕೊನೆಯ ಹಂತದಲ್ಲಿ ಮುಗ್ಗರಿಸಿದ್ದ ರಾಯಲ್ ಚಾಲೆಂಜರ್ಸ್ ಈ ಬಾರಿ ಗೆದ್ದೇ ತೀರುವ ಹುಮ್ಮಸ್ಸಿನಲ್ಲಿದೆ.
ಹೌದು… ಸತತ 17 ವರ್ಷದ ಕ್ರಿಕೆಟ್ ಕಾಳಗದಲ್ಲಿ 4ನೇ ಬಾರಿಗೆ ಫೈನಲ್ ತಲುಪಿರುವ ಆರ್ಸಿಬಿ, ಇಂದು ಗುಜರಾತ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಅಖಾಡಕ್ಕೆ ಇಳಿಯಲು ಸಜ್ಜಾಗಿದೆ. ಒಂದು ಕಡೆ ಮೊದಲ ಕ್ವಾಲಿಫೈಯರ್ನಲ್ಲಿ ಆರ್ಸಿಬಿ ವಿರುದ್ಧವೇ ಮುಗ್ಗರಿಸಿದ್ದ ಪಂಜಾಬ್ ರಿವೇಂಜ್ ತೀರಿಸಿಕೊಳ್ಳಲು ಕಾತೊರೆಯುತ್ತಿದ್ರೆ, ಇತ್ತ ಆರ್ಸಿಬಿ ಗೆಲುವಿನ ಲಯ ಮುಂದುವರೆಸಿ ತನ್ನ ಮೊದಲ ಕಪ್ಗೆ ಮುತ್ತಿಡುವ ಯೋಚನೆಯಲ್ಲಿದೆ.
ಈಗಾಗಲೇ ಐಪಿಎಲ್ 2025 ಫೈನಲ್ಗೆ ಸಕಲ ಸಿದ್ಧತೆಗಳೊಂದಿಗೆ ಕಂಗೊಳಿಸುತ್ತಿರುವ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಕರುನಾಡಿನ ಕೀರ್ತಿ ಹೆಚ್ಚಿಸಲು ಆರ್ಸಿಬಿ ತಂಡ ಭರ್ಜರಿ ಸಿದ್ಧತೆಯಲ್ಲಿತೊಡಗಿದೆ. ಇದನ್ನೂ ಓದಿ: ಆರ್ಸಿಬಿ ತಂಡಕ್ಕೆ ಆಲ್ ದ ಬೆಸ್ಟ್ ಹೇಳಿದ ರಮೇಶ್ ಅರವಿಂದ್
ಕರ್ನಾಟಕ ಸೇರಿದಂತೆ ದೇಶದಾದ್ಯಂತ ಆರ್ಸಿಬಿ ಅಭಿಮಾನಿಗಳು ಸಡಗರ ಸಂಭ್ರಮದಿಂದ ಆರ್ಸಿಬಿ ತಂಡ ಕಪ್ ಗೆದ್ದೇ ಗೆಲ್ಲುತ್ತದೆ ಎಂಬ ಭರವಸೆಯಿಂದ ಸಕಲ ಸಿದ್ಧತೆಯಿಂದ ಕಾಯುತ್ತಿದ್ದಾರೆ. ಅಷ್ಟೇ ಅಲ್ಲದೇ ಆರ್ಸಿಬಿ ತಂಡಕ್ಕೆ ರಾಜಕೀಯ, ಸಿನಿಮಾ ಹೀಗೆ ಹಲವಾರು ಕ್ಷೇತ್ರಗಳಿಂದ ಆಲ್ ದ ಬೆಸ್ಟ್ ಹೇಳುತ್ತಿದ್ದಾರೆ. ಒಟ್ಟಾರೆ 17 ವರ್ಷದಿಂದ ಕಪ್ ಗೆಲ್ಲದ ಎರೆಡೂ ತಂಡಗಳು ಕಾದಾಡುತ್ತಿದ್ದು ಇಂದು ಒಂದು ತಂಡದ ಕನಸು ನನಸಾಗಲಿದೆ. ಹಾಗಾದ್ರೆ ಇಂದು ನಡೆಯುತ್ತಿರುವ ಹೈ ವೋಲ್ಟೇಜ್ ಪಂದ್ಯಾವಳಿಯಲ್ಲಿ ಕಪ್ ಗೆಲ್ಲೋದು ಯಾರು? ಯಾರ ಮುಡಿಗೆ ಮೊದಲ ವಿಜಯಲಕ್ಷ್ಮೀ ಒಲೆಯುತ್ತಾಳೆ ಕಾದು ನೋಡಬೇಕಿದೆ.
