ಬೆಂಗಳೂರು: ಪತ್ರಿಕೋದ್ಯಮದ ಲೇಖಕರಾದ ಡಾ. ನಾಡಿಗ ಕೃಷ್ಣಮೂರ್ತಿ ಅವರ ‘ಭಾರತೀಯ ಪತ್ರಿಕೋದ್ಯಮ’ ಕನ್ನಡ ಕೃತಿಯನ್ನು ಕರ್ನಾಟಕ ಮಾಧ್ಯಮ ಅಕಾಡೆಮಿ ಮರುಮುದ್ರಿಸಿದ್ದು, ಇದರ ಪ್ರತಿಗಳನ್ನು ಬಿಡುಗಡೆಗೊಳಿಸಿ, ಒಪ್ಪಂದದ ಪ್ರಕಾರ ಕೃತಿಯ 25 ಪ್ರತಿಗಳನ್ನು ಮೈಸೂರು ವಿಶ್ವವಿದ್ಯಾಲಯದ ಕುಲಪತಿ ಪ್ರೊ. ಲೋಕನಾಥ್ ಅವರಿಗೆ ಹಸ್ತಾಂತರಿಸಲಾಯಿತು.
ಕರ್ನಾಟಕ ಮಾಧ್ಯಮ ಅಕಾಡೆಮಿ ಅಧ್ಯಕ್ಷೆ ಆಯೇಶಾ ಖಾನಂ ಅವರು ಮರುಮುದ್ರಣಗೊಂಡ ಕೃತಿಯ ಪ್ರತಿಗಳನ್ನು ಕುಲಪತಿಗಳಿಗೆ ಹಸ್ತಾಂತರಿಸಿದರು. ಈ ಸಂದರ್ಭದಲ್ಲಿ, ಕರ್ನಾಟಕ ಮಾಧ್ಯಮ ಅಕಾಡೆಮಿ ಸದಸ್ಯರುಗಳಾದ ಡಾ. ಎಸ್.ಮಮತಾ, ರಶ್ಮಿ ಮತ್ತು ಕಾರ್ಯದರ್ಶಿ ಮಹೇಶ್ ಉಪಸ್ಥಿತರಿದ್ದರು.
ಭಾರತೀಯ ಪತ್ರಿಕೋದ್ಯಮದ ಇತಿಹಾಸ, ಬೆಳವಣಿಗೆ ಹಾಗೂ ಪ್ರಮುಖ ಘಟ್ಟಗಳನ್ನು ದಾಖಲಿಸಿರುವ ‘ಭಾರತೀಯ ಪತ್ರಿಕೋದ್ಯಮ’ ಕೃತಿ ಪತ್ರಕರ್ತರು, ಪತ್ರಿಕೋದ್ಯಮ ವಿದ್ಯಾರ್ಥಿಗಳು, ಸಂಶೋಧಕರು ಹಾಗೂ ಓದುಗರಿಗೆ ಉಪಯುಕ್ತವಾಗಲಿದೆ.
ಪತ್ರಿಕೋದ್ಯಮದ ಶಿಕ್ಷಕ, ಲೇಖಕ ಮತ್ತು ಸಂಶೋಧಕರಾಗಿದ್ದ ಡಾ. ನಾಡಿಗ ಕೃಷ್ಣಮೂರ್ತಿ ಅವರು ಕರ್ನಾಟಕ ಮಾಧ್ಯಮ ಅಕಾಡೆಮಿಯ ಪ್ರಥಮ ಅಧ್ಯಕ್ಷರಾಗಿ 1982–83ರಲ್ಲಿ ಸೇವೆ ಸಲ್ಲಿಸಿದರು.
ಮರುಮುದ್ರಣಗೊಂಡ ಈ ಕೃತಿಯು ಶೀಘ್ರದಲ್ಲೇ ಕರ್ನಾಟಕ ಮಾಧ್ಯಮ ಅಕಾಡೆಮಿ ಕಚೇರಿಯಲ್ಲಿ ಮಾರಾಟಕ್ಕೆ ಲಭ್ಯವಾಗಲಿದೆ ಎಂದು ಅಕಾಡೆಮಿ ಪ್ರಕಟಣೆ ತಿಳಿಸಿದೆ.
