ಮಂಡ್ಯ: ಕರ್ನಾಟಕ ಜನಪದ ಲೋಕದಲ್ಲಿ ತಮ್ಮದೇ ಆದ ವಿಭಿನ್ನ ರೀತಿಯಲ್ಲಿ ವೀರಗಾಸೆ ಮೂಲಕ ಜನರ ಮನಸ್ಸು ಸೆಳೆಯುತ್ತಿದ್ದ ಹೆಸರಾಂತ ಕಲಾವಿದರಾದ ಮಹದೇವಪ್ಪನವರು ನಿಧನ ಆಗಿರುವುದರಿಂದ ಜಾನಪದ ಲೋಕಕ್ಕೆ ತುಂಬಲಾರದ ನಷ್ಟ ಆಗಿದೆ ಎಂದು ಮಾಜಿ ಸಚಿವ ಎನ್. ಚಲುವರಾಯಸ್ವಾಮಿ ಅವರು ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ.
ಈ ಕುರಿತು ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿರುವ ಮಾಜಿ ಸಚಿವರು, ಅರ್ಧ ಶತಮಾನಕ್ಕೂ ಹೆಚ್ಚು ಕಾಲ ವೀರಗಾಸೆ ಕಲೆಯನ್ನು ತಮ್ಮ ಉಸಿರಾಗಿಸಿಕೊಂಡಿದ್ದ ಮಹದೇವಪ್ಪನವರು ಮಂಡ್ಯ ಜಿಲ್ಲೆಯ ಹೆಮ್ಮೆಯಷ್ಟೇ ಅಲ್ಲ, ಇಡೀ ಕರ್ನಾಟಕದ ಜಾನಪದ ಲೋಕದ ಆಸ್ತಿಯಾಗಿದ್ದರು. ಅವರ ಡಮರುಗದ ನಾದ, ಹೆಜ್ಜೆಯ ಗತ್ತು, ಮುಖದ ಭಾವ ಕಂಡು ನಾಡಿನ ಜನ ಮೈಮರೆಯುತ್ತಿದ್ದರು. ಅವರ ನಿಧನದಿಂದ ಜಾನಪದ ಕ್ಷೇತ್ರದಲ್ಲಿ ಎಂದೂ ತುಂಬಲಾರದ ಶೂನ್ಯ ಸೃಷ್ಟಿಯಾಗಿದೆ ಎಂದು ಕಂಬನಿ ಮಿಡಿದಿದ್ದಾರೆ.
ಬಡತನದಲ್ಲೂ ಕಲೆಯನ್ನು ಬಿಡದ ಮಹದೇವಪ್ಪನವರು ನೂರಾರು ಶಿಷ್ಯರಿಗೆ ವೀರಗಾಸೆ ಕಲಿಸಿ, ಈ ಪರಂಪರೆಯನ್ನು ಮುಂದಿನ ಪೀಳಿಗೆಗೆ ದಾಟಿಸಿದರು. ಮೈಸೂರು ದಸರಾ, ಹಂಪಿ ಉತ್ಸವ, ರಾಜ್ಯದ ಎಲ್ಲಾ ಪ್ರಮುಖ ಜಾನಪದ ಸಮ್ಮೇಳನಗಳಲ್ಲಿ ಅವರ ಕಲಾಪ್ರದರ್ಶನ ನೋಡುಗರ ಮನ ಗೆದ್ದಿತ್ತು.
ಅವರ ಕಲಾ ಸೇವೆಯನ್ನು ಗುರುತಿಸಿ ರಾಜ್ಯ ಸರ್ಕಾರ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ನೀಡಿ ಗೌರವಿಸಿತ್ತು. ನಾನು ಜಿಲ್ಲಾ ಉಸ್ತುವಾರಿ ಸಚಿವನಾಗಿದ್ದಾಗ ಅವರನ್ನು ಸನ್ಮಾನಿಸುವ ಭಾಗ್ಯ ನನ್ನದಾಗಿತ್ತು. ಅತ್ಯಂತ ಸರಳ, ಸಜ್ಜನಿಕೆಯ ವ್ಯಕ್ತಿತ್ವ ಅವರದ್ದು. ಇದನ್ನೂ ಓದಿ: ನರೇಂದ್ರ ಮೋದಿ ಭೇಟಿ ಮಾಡಿದ ಸಿಎಂ ಡಿಕೆಶಿ
ನಾಗಮಂಗಲದಂತಹ ಹಳ್ಳಿಯಿಂದ ಬಂದು ದೇಶ-ವಿದೇಶಗಳಲ್ಲಿ ಮಂಡ್ಯದ ಹೆಸರನ್ನು ಪಸರಿಸಿದ ಕೀರ್ತಿ ಮಹದೇವಪ್ಪನವರಿಗೆ ಸಲ್ಲುತ್ತದೆ. ವೀರಗಾಸೆ ಎಂದರೆ ಮಹದೇವಪ್ಪ, ಮಹದೇವಪ್ಪ ಎಂದರೆ ವೀರಗಾಸೆ ಎಂಬಷ್ಟರ ಮಟ್ಟಿಗೆ ಅವರು ಹೆಸರಾಗಿದ್ದರು ಎಂದಿದ್ದಾರೆ.
