ಬೆಂಗಳೂರು: ಕರ್ನಾಟಕ ಸರ್ಕಾರ ಮತ್ತು ಜರ್ಮನಿಯ ಬರ್ಲಿನ್ ರಾಜ್ಯದ ನಡುವೆ ಬೆಂಗಳೂರಿನಲ್ಲಿ ನಡೆದ ಸಭೆಯಲ್ಲಿ ಆರ್ಥಿಕ ವ್ಯವಹಾರಗಳ ಜಂಟಿ ಉದ್ದೇಶ ಘೋಷಣೆಗೆ ಸಹಿ ಹಾಕಲಾಯಿತು ಎಂದು ಗ್ರಾಮೀಣಾಭಿವೃದ್ಧಿ ಮತ್ತು ಪ0ಚಾಯತ್ ರಾಜ್ ಹಾಗೂ ಮಾಹಿತಿ ತಂತ್ರಜ್ಞಾನ ಸಚಿವ ಪ್ರಿಯಾಂಕ್ ಖರ್ಗೆ ತಿಳಿಸಿದ್ದಾರೆ. ಬರ್ಲಿನ್ ಇಂಧನ ಮತ್ತು ಸಾರ್ವಜನಿಕ ಉದ್ಯಮಗಳ ಮೇಯರ್ ಮತ್ತು ಸೆನೆಟರ್ ಶ್ರೀಮತಿ ಫ್ರಾನ್ಜಿಸ್ಕಾ ಜಿಫೆ ಅವರ ಸಮ್ಮುಖದಲ್ಲಿ ಸಭೆ ನಡೆಯಿತು.
ಕರ್ನಾಟಕದ ಜಾಗತಿಕ ನಾವೀನ್ಯತೆ ಒಕ್ಕೂಟದ ಅಡಿಯಲ್ಲಿ ಈ ಪಾಲುದಾರಿಕೆಯು, ಆರಂಭಿಕ ವಿನಿಮಯ, ಸಾಫ್ಟ್-ಲ್ಯಾಂಡಿಂಗ್ ಬೆಂಬಲ ಮತ್ತು ಆಳವಾದ ತಂತ್ರಜ್ಞಾನ ಮತ್ತು ನಾವೀನ್ಯತೆ ಸಹಯೋಗವನ್ನು ಸಕ್ರಿಯಗೊಳಿಸುವ ಮೂಲಕ ಬರ್ಲಿನ್ ಮತ್ತು ಬೆಂಗಳೂರಿನ ನಡುವಿನ ಅಂತರವನ್ನು ಕಡಿಮೆ ಮಾಡಲಿದೆ ಎಂಬ ಅಭಿಪ್ರಾಯವನ್ನು ಸಚಿವರು ಈ ಸಂದರ್ಭದಲ್ಲಿ ವ್ಯಕ್ತಪಡಿಸಿದರು.
ಫಿನ್ಟೆಕ್, ಕೃತಕ ಬುದ್ಧಿಮತ್ತೆ, ಐಟಿ-ಡಿಜಿಟಲೀಕರಣ ಮತ್ತು ಜೀವ ವಿಜ್ಞಾನಗಳಂತಹ ಕ್ಷೇತ್ರಗಳ ಉದಯೋನ್ಮುಖ ತಂತ್ರಜ್ಞಾನಗಳಲ್ಲಿ ಬೆಂಗಳೂರು ಜಾಗತಿಕ ನಾಯಕತ್ವವನ್ನು ಪ್ರತಿಬಿಂಬಿಸುತ್ತದೆ ಮತ್ತು ನಾವೀನ್ಯತೆ ಮತ್ತು ಪರಿಸರ ವ್ಯವಸ್ಥೆಯ ಅಭಿವೃದ್ಧಿಯಲ್ಲಿ ಬರ್ಲಿನ್ ಸಾಮರ್ಥ್ಯಗಳಿಂದ ಪೂರಕವಾಗಿದೆ ಎಂದೂ ಸಚಿವ ಪ್ರಿಯಾಂಕ್ ಖರ್ಗೆ ಹೇಳಿದರು. ಇದನ್ನೂ ಓದಿ: ರಕ್ಷಣಾ ಸಚಿವರ ಜೊತೆ ದಸರಾ ಉತ್ಸವದ ಬಗ್ಗೆ ಚರ್ಚೆ: ಸಿಎಂ
ಮಹಿಳಾ ನೇತೃತ್ವದ ಉದ್ಯಮಗಳು ಮತ್ತು ಹಸಿರು ನಾವೀನ್ಯತೆಗಳ ಮೇಲೆ ವಿಶೇಷ ಒತ್ತು ನೀಡುತ್ತಿದ್ದೇವೆ. ಪ್ರಗತಿಯನ್ನು ಪತ್ತೆಹಚ್ಚಲು, ಕಾರ್ಯಕ್ರಮಗಳನ್ನು ಒಟ್ಟಾಗಿ ರೂಪಿಸಲು ಮತ್ತು ಫಲಿತಾಂಶ ಆಧಾರಿತ ವಿತರಣೆಯನ್ನು ಖಚಿತಪಡಿಸಿಕೊಳ್ಳಲು ಜಂಟಿ ಸ್ಟೀರಿಂಗ್ ಸಮಿತಿ ಮತ್ತು ಎರಡೂ ಕಡೆಗಳಲ್ಲಿ ಮೀಸಲಾದ ನೋಡಲ್ ಪಾಯಿಂಟ್ಗಳ ಮೂಲಕ ನಾವು ಶೀಘ್ರದಲ್ಲೇ ಈ ಪಾಲುದಾರಿಕೆಯನ್ನು ಸಾಂಸ್ಥಿಕಗೊಳಿಸುತ್ತೇವೆ ಎಂದು ಇಬ್ಬರು ನಾಯಕರೂ ಈ ಸಂದರ್ಭದಲ್ಲಿ ಹೇಳಿದರು.
