ಶಹಾಪುರ: ನಗರದ ಬಸವೇಶ್ವರ ಪ್ರದೇಶದಲ್ಲಿನ ಗದ್ದೇರಾಯನ ದೇವಸ್ಥಾನದ ಮುಂದುಗಡೆ ಬಸವೇಶ್ವರ ಪುತ್ಥಳಿ ಸ್ಥಾಪಿಸಲು (ಏ.30) ಬುಧವಾರ ಬಸವ ಸೇವಾ ಸಂಘ ಆಶ್ರಯದಲ್ಲಿ ಸಿದ್ಧಗೊಂಡಿದೆ. ಆದರೆ ಮೇಲ್ವರ್ಗದ ಸಮುದಾಯದ ಮುಖಂಡರನ್ನು ಮಾತ್ರ ಆಮಂತ್ರಣ ಪತ್ರಿಕೆ ಹೆಸರು ನಮೂದಿಸಿದ್ದಾರೆ. ಆದರೆ ಅಹಿಂದ ಸಮುದಾಯದ ಒಬ್ಬ ಮುಖಂಡರ ಹೆಸರು ನಮೂದಿಸದೆ ಇರುವುದು ಬಸವ ಸೇವಾ ಸಂಘ ಜಾತಿ ನಂಜು ಹರಿಬಿಟ್ಟು ಅಪಚಾರ ಎಸಗಿದೆ ಎಂದು ಅಖಿಲ ಕರ್ನಾಟಕ ವಾಲ್ಮೀಕಿ ಮಹಾ ಸಭಾದ ತಾಲ್ಲೂಕು ಘಟಕದ ಅಧ್ಯಕ್ಷ ಮಹಾದೇವ ಶಾರದರಳ್ಳಿ ಆರೋಪಿಸಿದ್ದಾರೆ.
ಬಸವೇಶ್ವರ ನಗರದಲ್ಲಿ ಬ್ರಾಹ್ಮಣ, ವಾಲ್ಮೀಕಿ, ಕುರುಬ, ಕಬ್ಬಲಿಗ, ಮುಸ್ಲಿಮ್ ಸಮುದಾಯದವರು ವಾಸವಾಗಿದ್ದಾರೆ. ಅಲ್ಲದೆ ಬಸವ ಸೇವಾ ಸಂಘದ ಮುಖಂಡರು ಬಸವೇಶ್ವರ ಪುತ್ಥಳಿ ಖರೀದಿಸಲು ಅಹಿಂದ ಸಮುದಾಯದ ಮುಖಂಡರಿಂದ ಹೆಚ್ಚಿನ ಧನ ಸಹಾಯವನ್ನು ಪಡೆದುಕೊಂಡಿದ್ದಾರೆ. ಆದರೆ ಪುತ್ಥಳಿ ಸ್ಥಾಪನೆಯ ಕಾರ್ಯಕ್ರಮದಲ್ಲಿ ಅಹಿಂದ ಸಮುದಾಯದ ಮುಖಂಡರನ್ನು ಕಡೆಗಣಿಸಿರುವುದು ಅತ್ಯಂತ ನಾಚಿಗೇಡು ಸಂಗತಿಯಾಗಿದೆ ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಜಾತಿ ವಿನಾಶಕ್ಕೆ 12ನೇ ಶತಮಾನದಲ್ಲಿ ಕ್ರಾಂತಿಯ ಮೊಳಗಿಸಿದ ಮಾನವತಾವದಿ ಎಲ್ಲಾ ಜಾತಿ ಜನಾಂಗಗಳ ಶರಣು ಆಗಿದ್ದಾರೆ ಎಂಬ ಭಾವನೆಯನ್ನು ನಂಬಿಕೆ ಹಾಗೂ ವಿಶ್ವಾಸದಿಂದ ಅಹಿಂದ ಸಮುದಾಯದವರು ಸಂಭ್ರಮಿಸಿದ್ದೇವು. ಆದರೆ ಆಮಂತ್ರಣ ಪತ್ರಿಕೆಯಲ್ಲಿ ಮೇಲ್ವರ್ಗವನ್ನು ಆಹ್ವಾನಿಸಿರುವುದು ಬೇಸರ ಮೂಡಿಸಿದೆ ಎಂದು ಬಸವೇಶ್ವರ ಬಡಾವಣೆಯ ಅಹಿಂದ ಮುಖಂಡರು ನೋವು ತೋಡಿಕೊಂಡಿದ್ದಾರೆ.
ಎಲ್ಲಾ ಸಮುದಾಯ ಒಳಗೊಂಡು ಪುತ್ಥಳಿ ಸ್ಥಾಪಿಸಲಿದ್ದೇವೆ. ಸಣ್ಣಪುಟ್ಟ ತಪ್ಪು ಆಗಿದೆ. ಮುಂದೆ ಇಂತಹ ಪ್ರಮಾದ ಆಗದಂತೆ ಎಚ್ಚರವಹಿಸಲಾಗುವುದು ಎಂದು ಬಸವ ಸೇವಾ ಸಂಘ ಗೌರವ ಅಧ್ಯಕ್ಷರಾದ ಚೆನ್ನಪ್ಪಗೌಡ ಶಿರವಾಳ ತಿಳಿಸಿದ್ದಾರೆ.
